БАЧКА ТОПОЛЯ/НОВЕ ОРАХОВО – Медзи тогорочнима троїма добитнїками найпрестижнєйшей награди Општини Бачка Тополя „Про урба” и КУД „Петро Кузмяк” з Нового Орахова, хторе за Награду предложели вецей цивилни орґанизациї.
Традицийну Награду „Про урба” ше додзелює з нагоди Дньох општини Бачка Тополя, а визначним поєдинцом и орґанизацийом уручена є всоботу, 15. септембра, на Шветочней схадзки Скупштини општини Бачка Тополя. На схадзки поєдинцом и колективом уручени и Подзекованя.
Попри КУД „Петро Кузмяк”, найвисше припознанє у општини „Про урба” достали подобови педаґоґ и уметнїк Ана Немет з Бачкей Тополї и Здруженє женох „Дуга” з Панониї.
Награду уручел предсидатель Општини Ґабор Кишлиндер, а у мено КУД-а „Петро Кузмяк” приял ю Владимир Маґоч.
Днь Општини Бачка Тополя почали 11. септембра и буду закончени на нєдзелю, 20. септембра, а у їх рамикох отримани, лєбо буду, велї културни, музични, спортски и други програми и манифестациї.