РИО ДЕ ЖАНЕИРО (БРАЗИЛ) – На Олимпияди у Рио де Жанеиру репрезентативец Сербиї Михаил Дудаш нєшка ше почина змагац у своєй дисциплини – дзешецбою.
Пред одходом до Рио де Жанеира, Михаил Дудаш виявел же на Олимпийских бавискох пробує витвориц цо лєпши резултат, а циль му нападнуц особни рекорд.
– Резулати на тренинґох указую же ми форма нє опадла и же мам шансу нападнуц особни рекорд и бориц ше за цо лєпши пласман. И мойо очекованя ше нє пременєли. Жадам ґу каждей дисциплини приступиц як кед би була єдна єдина, и будзем ше бориц сам зоз собу на цалим змаганю – виявел Дудаш пред одходом до Рио де Жанеира.
После покалїченя пре котре нє наступал два роки, Дудаш ше ознова почал змагац, та прешлого мешаца освоєл бронзову медалю на Европским першенстве у Амстердаму.
– Поента дзешецбою же би ше направело дзешец найлєпши резултати. Други Олимпийски бависка указую же перши нє були случайносц и же можем обчековац и треци. Сами бависка коруна успиху каждого спортисти и його спортскей кариєри и прето сцем у тим уживац – виявел Михаил котри ше за бависка пририхтовал на Бледу.
Змаганє у дзешецбою будзе тирвац нєшка и ютре (17. и 18. авґуста). По розпорядку нєшка буду отримани змаганя – на 100 м (14,30 г. по нашим), скаканє до далєка (15,35 г.), руцанє кулї (17,15 г.), скаканє до висока (22,45 г.) и обегованє на 400 м (2,20 г.). Другого дня (18. авґуста) – 110 м з препреченями (14,30 г.), руцанє диска (15,25 г.), скаканє з палїцу (18,25 г.), руцанє копиї (23,35 г.) и обегованє на 1 500 м (02,45 г.).