КОВАЧИЦА – Нєшка и на ютре, 19. и 20. септембра, у Ковачици будзе отримана роботна схадзка Координациї националних совитох (НС) националних меншинох у Сербиї, на хторей участвую и члених одборох за штири штири обласци над хторима совити маю компетенцию – за образованє, информованє, културу и за службене хаснованє язика и писма.
Нєшка будзе робота по спомнутих одборох, як и Роботней ґрупи Координациї за Акцийни план за поглавє 23 у приступаню до ЕУ, о чим будзе бешеди и на одборох. На ютре плановане отримац заєднїцку схадзку и завжац становиска и заключеня з роботи по одборох, хтори буду послати до компетентних министерствох Влади Сербиї.
На Координациї буду одредзени и стаємни состави делеґацийох националних совитох националних меншинох хтори их буду заступац у прегваркох з компетентнима министерствами о питаньох и вимогох вязаних за национални меншини у Сербиї.
Спред Националного совиту Руснацох на роботней схадзки у Ковачици буду присуствовац заменїк предсидателя НС Йовґен Мудри, предсидатель Вивершного одбору Совиту Желько Ковач и предсидателька Одбору за образованє НС Мелания Римар.