РУСКИ КЕРЕСТУР – Нєшка, 26. юлия, коло 17 годзин до Руского Керестура приду двоме паломнїки-шедлаче на коньох з Мадярскей и їх провадзаче, а у Керестуре буду и на ютре, 27. юлия. На тото свойофайтове шедлацке паломнїцтво рушели 4. юлия, а нащивя вецей места у Сербиї.
На уходзе до Керестура з Лалитю их дочекаю и члени Конїцкого клубу „Русин” зоз своїма запрагами и вєдно прейду по Вельким шоре и дзепоєдних улїцох. На 19,30 г. нащивя музейну збирку у Замку и Катедралну церкву, а после заєднїцкей вечери з домашнїма, пойду до Водици, дзе буду змесцени паломнїки и їх конї.
На ютре, 27. юлия, у Водици на 10 годзин будзе Служба Божа, а по Служби, паломнїки-шедлаче приду до центру Керестура, дзе на криж у центре положа чудотворни металиї з Марийову подобу и шерцами Исусовим и Марийовим, а металиї дзеля и гражданом.
Спрам скорейших спознаньох, тото паломнїцтво тирва уж два роки и дотераз у Мадярскей обишли места коло сербскей и горватскей гранїци и дзе преходза на одредзених местох зохабяю спомнути металиї. На своєй драги нащивюю и постояци водици и други паломнїцки места, та нащивя и керестурску Водицу.
До Руского Керестура паломнїки приходза зоз Селенчи и предлужа до Дорослова, понеже през драгу нащивюю и места дзе жию рижни националносци.