РУСКИ КЕРЕСТУР – У Руским Керестуре вчера, 20. децембра, з пригодну шветочносцу означена 25-рочнїца снованя Рускей матки (РМ). Шветочносц отримана у Хорскей сали Дому култури, а попри членох РМ и других госцох, єй предсидатель Дюра Папуґа окреме привитал предсидателя Бунєвскей матки Ивана Седлака, предсидательку Матки словацкей Катарину Мелеґову Мелихову, предсидателя Вивершного одбору Националного совиту Руснацох Желька Ковача, началнїка Општинскей управи Шид Ромка Папуґу, а пречитани и привитно-винчуюци писма Матици сербскей, предсидателя Шветовей ради Русинох/Руснацох/Лемкох Штефана Лявинца з Будапешту, як и члена Матици сербскей и Рускей матки Дюру Милекича з Арандєловцу.
У културно-уметнїцкей програми вецей руски шпиванки одшпивала Кристина Афич, котру на тамбуркох провадзели Павле Рац и Жарко Остоїч и Хлопска шпивацка ґрупа керестурского Дому култури. Мария Дорошки и Любица Няради пречитали писнї Владимира Сабо Дайка, Михала Ковача, Штефана Гудака и єдну крачунску винчованку, док Славко Пап пречитал два свойо писнї.
Предсидатель Рускей матки Дюра Папуґа з тей нагоди пречитал реферат з назву „Очуванє власного идентитету Руснацох”, у хторим наглашел же РМ основана 28. децембра 1990. року, як гварел – „у чаше кед кед ше за свой идентитет Руснаци мушели знова почац бориц на найозбильнєйши способ”. Здогаднул же, попри нього, у Инициятивним одборе за снованє Матки були Михайло Варґа, Яков Фейса, Дюра Папгаргаї и Владимир Сабо Дайко, же було и процивнїкох снованю РМ, а значну часц свойого реферату пошвецел активносцом Шветового конґресу Русинох/Руснацох/Лемкох, хторому РМ єден зоз сновательох и його порядни учашнїк, як и Шветовому форуму Русинскей младежи.
З нагоди свойого ювилею, РМ на вчерайшей шветочносци уручела и вецей подзекованя орґаном, орґанизацийом и установом, як и припознаня найактивнєйшим поєдинцом, а у мено наградзених подзековал Владимир Дудаш.
Наглашуюци значєнє маткох за очуванє националного идентитету, язика и култури за єден народ, чи националну меншину, ювилей РМ на концу програми и особнє повинчовали предсидатель Бунєвскей матки Иван Седлак и предсидателька Матки словацкей Катарина Мелеґова Мелихова.
