МИКЛОШЕВЦИ – Вчера вечар у Миклошевцох отримана перша схадзка Орґанизацийного одбору за означованє 165-рочнїци приселєня Руснацох до Миклошевцох.
Пририхтованя почали вельо скорей, а на вчерайшей схадзки предложене же би ше шветочне означованє ювилею отримало концом новембра, лєбо штредком децембра того року. Конєчни датум будзе утвердзени после консултацийох з високим покровительом преслави – предсидательом Собору (парламенту) Републики Горватскей (РГ) Йосипом Леком.
На схадзки розпатрани и змисти програми з нагоди ювилею, та будзе отримана Шветочна схадзка месних здруженьох, представительох Општини, Жупаниї и Републики, а плановани и два вистави – старих фотоґрафийох и ручних роботох.
У рамикох означованя 165-рочнїци приселєня Руснацох до Миклошевцох будзе и промоция фотомоноґрафиї Дюру Лїкара „Миклошевци под сримским нєбом”, за хтору предслово написал висши сотруднїк Институту за миґрациї и народносци РГ др.сц. Филип Шкїлян, а рецензенти др.сц. Оксана Тимко Дїтко и о. Яким Симунович.
Плановане отримац и стретнуце руских писательох з РГ, а члени миклошевского КУД „Яким Ґовля” би виведли кратши концерт народних шпиванкох и танцох, о чим ище ушлїдза поради на идуцей схадзки Орґанизацийного одбору за означованє рочнїци.