ОСИЄК (ГОРВАТСКА) – У орґанизациї КУД Руснацох Осиєк, з финансийну потримовку Совиту за национални меншини Републики Горватскей (РГ) и Осиєцко-бараньскей жупаниї, всоботу, 3. децембра, у Осиєку отримани 12. „Дравски габи” – стретнуце хорох и шпивацких ґрупох Руснацох у РГ. Наступели шейсц руски дружтва з Горватскей, та Матки Словацкей з Осиєку, як и КПД „Дюра Киш” зоз Шиду, як госц з иножемства.
З Горватскей наступели шпивацки ґрупи КУД „Осиф Костелник” з Вуковару, КД Руснацох з Винковцох, КУД „Яким Ґовля” з Миклошевцох, КУД „Яким Гарди” з Петровцох, Дружтва Руснацох у РГ „Руснак” з Петровцох, як и домашнї з КУД Руснацох Осиєк, вєдно коло 150 учашнїки.
Учашнїкох, публику и госцох на програми привитали предсидателька КУД Руснацох Осиєк Агнетка Балатинац, спред Координациї рускей националней меншини РГ єй предсидатель Борис Бучко, спред Союзу Руснацох РГ предсидателька Дубравка Рашлянин, а манифестацию отворела подпредсидателька Совиту за национални меншини РГ Рената Тришлер.
Попри представительох дружтвеного, политичного и вирского живота з Републики Горватскей, на „Дравских габох” присуствовала и делеґация Националного совиту Руснацох Сербиї, на чолє з предсидательом Славком Рацом.
Руснаци з Осиєку з „Дравскима габами” свойому городу повинчовали 230 родзени дзень, а з манифестацию означена и 33-рочнїца роботи КУД Руснацох Осиєк.
По законченей програми за шицких присутних орґанизоване друженє з руску музику, шпиванку и танцом.