ДЮРДЬОВ – Всоботу, 6. децембра, у просторийох КУД „Тарас Шевченко” у Дюрдьове, а у орґанизациї младих з того Дружтва, отримани 4. Литературни вечар младих, на хторим ше учашнїки представели з рижнима жанрами уметносци.
Свою поезию пречитали Ваня Дула з Дюрдьова, Саша Сабадош зоз Зомбора, Ася Папуґа и Любица Кнежевич з Руского Керестура, Наташа Шовш з Коцура, док Снежана Васич, тиж з Коцура, пречитала даскельо твори Славея Шанту.
Дюрдьовчанє Ириней Барна и Марко Шовш участвовали з музичнима точками на гармоники и примки, а Сашо Палєнкаш з Керестура одграл єдну композицию на ґитари.
Ивана Киш з Дюрдьова представела свой есей о уметносци, Себастиян Няради виведол свою стенд-ап комедию, Иґор Горняк Пишта з Коцура представел свойо видзенє о тим же „хто прави Руснак”, Яким Винаї Цумай з Керестура пречитал свою сучасну прозу, а Мирко Горняк Коле з Керестура свойо афоризми.
Пущани и фотомонтировани фотоґрафиї Михаила Раґая з Дюрдьова, як и документарни филм Сашу Палєнкаша „Горнїца – Terra incognita”.
У рамикох Литературного вечару отримана и вистава чарно-билих фотоґрафийох Марияни Павлович з Руского Керестура, з єй кнїжки фотоґрафийох „Проблеми”, хтора вишла як додаток МАК-у, як и вистава коло 50 скицох, малюнкох и рисункох Ивана Киша з Дюрдьова. Конферансу водзели Лидия и Кристина Горняково.
