МИКЛОШЕВЦИ – Школяре Основней школи „Чаковци” зоз подручнима оддзелєнями Миклошевци, Берак и Томповци вчера зоз наставнїками препровадзели, а так будзе и нєшка, школски днї на вилєтним месце Белило реализуюци проєкт „Млади у природи”, а у рамикох преслави Дньох Општини Томповци.
Попри наставнїкох, зоз дзецми були члени Локалней акцийней ґрупи „Срим” и Явней установи за управянє защицених природних вредносцох Вуковарско–сримскей жупаниї, котри визначели значносц томповских ритох як природного богатства того подруча, розпатрали з нїма околни лєс и рошлїново–животиньски швет.
Белило ше находзи медзи Миклошевцами и Томповцами, и тей яри ознова ожило дзекуюци Општини котра достала средства на основу спомнутого проєкта од Министерства социялней политики и младих Републики Горватскей хторе обезпечело 9 тисячи евра. Од тих пенєжох положени закрица, древени лавки и столи, кошарки за шмеце, ушорени спортски терени, поставени колїмбачки. По словох Йосипа Ковача, автора того проєкта, на тим просторе жителє Општини Томповци би ше требали сходзиц, рекреировац, отримовац рижни спортски змаганя, подобово колониї и инше..
ж