КОЦУР – З нагоди означованя Дня Святого Сави у коцурским Дому култури вчера, 24. януара, КУД „Завичайне врело” отримало VII Святосавски концерт.
Програма почала зоз Святосавску химну, a числена публика мала нагоду чуц и пригодну бешеду о значносци дїла и подоби Святого Сави.
У програми попри домашнїх членох КУД-а ,,Завичайне врело” участвовала и Младежска мишана шпивацка ґрупа КУД ,,Жатва”, як и Етно ґрупа ,,Аваз” зоз Вербасу.
Кажду танєчну точку, рецитацию и писню публика у полней сали Дома култури наградзела зоз громким аплаузом.
Орґанизацию Святосавского концерту помогли Општина Вербас, Месна заєднїца Коцур, Туристична орґанизация општини Вербас, Польопривредна фахова служба Вербас, як и велї други привреднїки зоз Коцура и Вербасу.
Нєшка, 25. януара, у Пелетовей сали будзе орґанизовани 20. Країшски вечар на котрим годни уживац числени Коцурци, алє и госци. За добре розположенє шицких котри буду присуствовац тому традицийному друженю задлужени буду Джими, Боки и Цеца.