Паломнїки на коньох прейду и през Керестур

автор зам; фото сен
1.2k Опатрене

РУСКИ КЕРЕСТУР – До Руского Керестура медзи 25. и 27. юлийом приду двоме шедлаче на коньох з Мадярскей, котри на тото свойофайтове шедлацке паломнїцтво рушели 4. юлия, а зайду и до Сербиї.

О нащиви шедлачох з Мадярскей и їх драги Керестурцох вчера, 11. юлия, на сходзе у Доме култури подробнєйше поинформовал єден з орґанизаторох паломнїцтва – привреднїк Чаба Пустай з Купусини, а на поради були керестурски парох о. Михайло Малацко, о.д. длужносци директора Дому култури Яким Рац, предсидатель Конїцкого клубу „Русин” Желько Папуґа и майстор-каменяр Владимир Малацко, ст.

Як гварел Пустай, тото паломнїцтво тирва уж два роки и дотераз у Мадярскей обишли места коло сербскей и горватскей гранїци и дзе преходза на одредзених местох зохабяю чудотворни металиї з Марийову подобу и шерцами Исусовим и Марийовим, а металиї дзеля и гражданом. Порадзене же у Керестуре чудотворни металиї положа на криж у центре валалу, а понеже на своєй драги нащивюю и постояци водици и други паломнїцки места, нащивя и керестурску.

У Водици и прешпя, там будзе и Служба Божа, а попри вирних и других Керестурцох, зоз своїма запрагами их дочекаю и члени домашнього Конїцкого клубу „Русин”, аматере Дому култури у народним облєчиве, а можлїве же за госцох буду пририхтани и дзепоєдни други змисти.

Точни датум єднодньовей нащиви шедлачох и їх провадзацей екипи будзе познати по 24. юлий. До Керестура приду зоз Селенчи и предлужа до Дорослова, понеже през драгу нащивюю и места дзе жию рижни националносци.

4-Sedlace-02

ПОВЯЗАНИ ТЕКСТИ