РУСКИ КЕРЕСТУР – Паломнїки-шедлаче, пооблекани до мадярского бетярского облєчива и гусарскей униформи, котри вовторок пополадню пришли до Руского Керестура, вчера рано окончели свою мисию, а то покладанє чудотворних металийох у центру валалу, вєдно з керестурским парохом о. Михайлом Малацком.
На криж у центре, як и на ище дакельо места у центре валалу, положени по три металиї – як символ Оца, Сина и Духа Святого. Металиї служа за охрану од злого, а на своєй драги, окрем на одредзени места, паломнїки их дзеля и людзом.
Попри ширеня мира, паломнїки збераю и подписи потримовки за вибудов каплїци у Комлошки у Мадярскей, дзе жию и Русини.
Пред одходом на дальшу драгу до Дорослова, паломнїки-шедлаче були и на Служби Божей у Водици, дзе их, у присустве красного числа Керестурцох, благословел парох о. Малацко и пожадал им щешлїву драгу.
У орґанизациї пребуваня паломнїкох у Руским Керестуре участвовали рускокерестурска Парохия, Конїцки клуб „Русин”, Месна заєднїца Руски Керестур и Дом култури Руски Керестур, а на драги по Сербиї им домашнї Чаба Пустаи з Купусини.