РУСКИ КЕРЕСТУР – У рамикох паломнїцтва по Сербиї, паломнїки-шедлаче з Мадярскей вчера пополадню пришли и до Руского Керестура. На драгу рушели 4. юлия, дотераз обишли места у Банату и Сриме, а тераз на шоре Бачка.
Паломнїки члени мадярского конїцкого клубу, котри влонї на коньох обишли скоро цалу Мадярску и людзом дзелєли чудотворни металиї же би их хранєли од злого.
На уходзе до Керестура з Лалитю вчера их дочекали члени Конїцкого клубу „Русин”, млади члени секцийох Дому култури Руски Керестур пооблєкани до народного облєчива, вєдно з нїма свойого коня шедлал и Керестурец Иван Медєши, та ше превезли по валалє, цо виволало вельке интересованє гражданох. Паломнїки нащивели и музейну збирку у Замку и Катедралну церкву.
На местох хтори обиходза паломнїки людзом даваю спомнути металиї, а охабяю их и на уходзе, у центре, лєбо на виходзе з даєдного места.
Нєшка на 10 г буду на Служби Божей у Водици, а по Служби на криж у центре Керестура положа чудотворни металиї з Марийову подобу и шерцами Исусовим и Марийовим.