Победзели композициї Агнети Тимко Мудри

автор ртв/зам
939 Опатрене

НОВИ САД – Композиция „Я вше будзем твоя”, авторки музики и тексту Агнети Тимко Мудри, у аранжману Дьордя Планянина освоєла першу награду фахового жирия, а композиция „Най му слунко швици”, тиж на музику и текст Агнети Тимко Мудри, у аранжману Мирона Сивча – награду публики на 26. Фестивалє новей рускей народней шпиванки „Ружова заградка”, хтори вчера, 6. марца, у орґанизациї Радио телевизиї Войводини (РТВ) отримани у Студию М у Новим Садзе. Побиднїцки композициї шпивали Катарина Кочиш и Саня Полдруги.

Другу награду по думаню фахового жирия освоєла шпиванка „Орґона”, композитора Михайла Будинския, котри вєдно з Таню Будински написал и текст, у аранжману Мичу Янковича, а шпивал ю сам автор, док трецу награду достала шпиванка „Нє питай ше” композитора Мирослава Папа, котри и єй аранжер, на текст Мирослави Даждиу, а у виводзеню Бориса Маґоча.

Награду за текст достал Никола Чизмар Коле, за шпиванку „На Кирбаю”, хтору сам и компоновал, а шпивала Александра Колбас; награду за аранжман достал Йован М. Йованович, за шпиванку „Дїдов калап”, композиторки Драґани Ґлувня Бабич‚ на текст Владимира Дїтка и у интерпретациї Марка Радишича, а награду за найлєпшу интерпретацию достала млада Катарина Кочиш, котра шпивала горе спомнуту побиднїцку композицию.

На Фестивалє того року виведзени 15 нови композициї, оценьовал их фахови жири – Зоран Дракула, Лїляна Барна Никитович, Сенка Станкович и Микола Шанта, а о награди публики гласали присутни патраче у сали Студия М. Шпивачох провадзел Вельки народни оркестер РТВ-а, под руководительством Мичу Янковича и Студийска вокална ґрупа.

Тогорочни 26. Фестивал новей рускей народней шпиванки „Ружова заградка”отворел ґенерални директор РТВ Срдян Михайлович, а пред музичну часцу, вистави подобових роботох двох уметнїцох з Кули – Лидиї Барна и Амалиї Ковач, у голу Студия М отворел директор Заводу за културу войводянских Руснацох Серґей Тамаш.

У ревиялней часци „Ружовей заградки” свою богату музичну творчосцу представел наш познати композитор, аранжер и музични фаховец Юлиян Рамча Чамо з Руского Керестура, котри и дириґовал з Вельким тамбуровим оркестром керестурского Дому култури под час виводзеня вецей його композицийох.

„Ружова заградка” источашнє и перши фестивал у року з Календара репрезентативних манифестацийох Националного совиту Руснацох, директно є преношени на Трецей мрежи Радия РТВ и на Другей програми ТВ Войводини, а цалосни знїмок „Ружовей заградки” на ТВ будзе нєшка на 9 годзин, а на радию на 12,10 годзин.

ПОВЯЗАНИ ТЕКСТИ