РУСКИ КЕРЕСТУР – Вчера, 13. септембра, у Руским Керестуре отримани турнир у лапаню риби на циґонь у рамикох Спортских бавискох „Яша Баков”.
Змаганє отримане на ткв. лалицким беґелю, а участвовали осем екипи – з Руского културног центру з Нового Саду, КУД „Петро Кузмяк” з Нового Орахова, КУД „Тарас Шевченко” з Дюрдьова, КПД „Карпати” з Вербасу, Здруженє рибарох „Линяк” з Миклошевцох (Горватска), „Папивинґ” д.о.о. з Вербасу и два екипи домашнього Здруженя спортских рибарок „Коляк”. Кажда екипа мала по трох членох, а риби ше лапало штири годзини – од осем до поладня.
Найвецей риби у чуварки мала екипа з Вербаского КПД „Карпати” – 6,28 кґ, а друге и треце место завжали домашнї екипи „Коляк 2” з 5,03 кґ влапеней риби и „Кояк 1”, з 4,14 кґ риби.
Поєдинєчно найлєпши рибар бул Михайло Костелник з керестурскей екипи „Коляк 1”, хтори влапел 2,34 кґ риби, други бул Ґоран Вовк (2,25 кґ), а треце место освоєл Ґоран Пожонї (2,11 кґ риби), обидвоме з Вербасу.