РУСКИ КЕРЕСТУР – У 13. колу Войводянскей рукометней лиґи Сивер, рукометаше Русина внєдзелю 23. мая дочекали „старихˮ ривалох зоз Сивцу.
Обидва екипи на початку змаганя ше зманьовали у водзеню резултата. Було то лєм зоз єдним ґолом розлики, но видна була и єднакосц екипох. Заш лєм, на конєц першого полчасу вошло ше зоз минималну предносцу на Русинов хасен. Друга часц ше нє вельо розликовала. Було то праве хлопске, безкомпромисне бависко у надмудрованю.
У Русину, на нєдзельовим змаганю, найефикаснєйши були – Филип Орос хтори посцигнул 8 ґоли, Филип Тома 7, капитен Славко Гербут 6, Борис Югик и Виктор Микита по 5 ґоли, Владислав Салаґ 2, и Иван Рац и Мирослав Виславски дали по 1 ґол.
Русин хвильково 3. на таблїчки зоз 13 бодами, док у шлїдуюцим и остатнїм колу госцує у Кляїчеве, дзе би го побида затримала на 3. месце.