НОВИ САД/РУСКИ КЕРЕСТУР – До Националного совиту (НС) Руснацох стреду, 18. марца, з Висшого суду у Новим Садзе сцигла службена информация же постала половажна и виновна пресуда НС процив Еви Барановей пре „злохаснованє службеного положеня зоз здобуваньом з виновним дїлом фалсификованя службеного документу”, як и процив Петра Поповича, пре „злохаснованє службеного положеня у помаганю”, котри од НС Руснацох нєовласцено вжали пенєж 2008. и 2009. року.
Пресуда Висшого суду од 26. новембра 2013. року, после жалби обвинєних, постала половажна з одлуку Апелацийного суду у Новим Садзе, 2. децембра прешлого року, а до Висшого суду є доручена 9. фебруара того року.
З тим Апелацийни суд потвердзел пресуду Висшого суду, з хтору Ева Баран осудзена на єдинствену кару гарешту од єдного рока и три мешаци, а Петар Попович на єдинствену кару гарешту од три роки, так же после скорейших пресудох у другим поступку о врацаню украднутого пенєжу до НС, з тим закончени и виновни поступок процив обвинєних.
Баранова НС Руснацох, вєдно зоз судскима трошками и камату, ма врациц прей милион 800 000 динари, а НС ище скорей достал и суд з хторим Войводянска банка врацела прейґ 620 000 динари, хтори нєовласцено вжал обвинєни Попович.
Баранова перше 2008. року врацела нє цали 280 000 динари, а з одвитуюцима пресудами, НС припадла половка єй квартелю у Новим Садзе, вредносци коло 800 000 динари, так же є длужна ище коло милион динари, цо у поступку за врацанє.