НОВИ САД – Тогорочна шатва у Войводини будзе на милион и 100 000 гектарох, нагадованє же вельо менєй будзе зашате цукровей цвикли, а найзаступенша житарка и далєй будзе кукурица, преноши РТВ оцену Привредней комори Войводини (ПКВ).
При планованю продукциї, за польопривреднїкох важне знац яки мири аґрарней политики ше будзе запровадзовац и кельо пенєжи достаню за субвенциї, понеже ше од того року субвенциї будзе доставац на маєтки до 20 гектари.
– Польопривреднїки знова буду мушиц сами финансовац ярню шатву и знова нє достали информацию о тим кеди и кельо пенєжи достаню за субвенциї. Закон о предшатвовим финансованю, по хторим польопривреднїком требало обезпечиц пенєж за шатву, почнє ше применьовац аж штредком рока, гварел секретар у ПКВ задлужени за польопривреду Дьордє Буґарин.