Портуґалия шампион Европи

автор апал
1.3k Опатрене

Закончене петнасте Европске першенство у фодбалу у Французкей. Бавело ше на дзешец  стадионох, у дзешец городох у Французкей. Одбавене 51 змаганє, а репрезентация Портуґалиї, у остатнїм, финалним, зоз екипу домашнїх Французкей, освоєла титулу шампиона Старого континента. Побидоносни, шампионски ґол дал Едер у предлуженю змаганя.

Од початку змаганьох портуґалски фодбалере од седем змаганьох, у реґуларним цеку, победзели лєм єдно, процив екипи Велсу у полуфиналу. Резултат бул 2:0. У змаганьох по ґрупох, Портуґалци почали зоз трома нєришенима змаганями. У ґрупи окрем нїх були екипи Исланду, Австриї и Мадярскей. Мож повесц же у тей часци мали щесца, бо ше у нє  моцней ґрупи лєдво прецагли до закончуюцей фази.

Випатра же их щесце нє напущело анї у предлуженю першенства. Горватску репрезентацию победзели з 1:0, з ґолом хтори посцигли аж у другей часци предлуженя. З репрезентацию Польскей бавели нєришено, та ше побиднїка одредзело на пенали. И ту мали  вецей щесца. Побида процив екипи Велсу була єдина и заслужена. У финалним змаганю єдини и шампионски ґол посцигнул Портуґалєц Едер у 109. минути (у предлуженим часу). Кед ше вежнє до огляду же екипа Портуґалиї од 24. минути бавела без Кристияна Роналда, найлєпшого бавяча у екипи, анї тей побиди нєт цо пригвариц.

Кед слово о екипох хтори участвовали у закончуюцих змаганьох на першенстве Европи у Французкей, нє було вельо нєсподзиваня. Велї з нас так повесц од самого початку типовали на штири екипи – Французку, Нємецку, Портуґалию и Анґлию. Но, и на тей смотри европского фодбалу ше потвердзело же вецей вельких фаворитох нєт. Нє було анї вельких майстрох, та анї бависка хторе би було красне за око. Медзитим, єст вельо приємни нєсподзиваня, то насампредз екипа Исланду и Велсу хтори велїм указали же можу буц приклад як ше бави пожертвовно, упарто и моцно.

ФОДБАЛСКИ ДРИМ ТИМ

Специялна и фахова комисия, на чолє зоз вельким меном у фодбалє Алексом Ферґусоном, вибрала найлєпших фодбалерох хтори би творели екипу Европи.

Найлєпши фодбалере Европского першенства то: ґолман Руи Патрисио (Портуґалия), Джошуа Кимих (Нємецка), Джером Боатенґ (Нємецка), Пепе (Портуґал), Тони Крос (Нємецка), Джо Ален (Велс), Антоан Ґризман (Французка), Арон Ремзи (Велс), Дмитри Пає (Французка) и Кристияно Роналдо (Портуґалия).

Найлєпши бавяч и стрилєц на першенстве бул Антоан Ґризман зоз репрезентациї Французкей. На змаганьох дал шейсц ґоли и мал два асистенциї.

ПОВЯЗАНИ ТЕКСТИ