РУСКИ КЕРЕСТУР – У присустве численей публики, у Руским Керестуре вчера вечар почал традицийни Ноцни турнир у малим фодбалє, у орґанизациї Спортского дружтва „Русин”.
На Турнире того року участвую 18 екипи у трох возростох – три у катеґориї младших пионирох, пейц у катеґориї старших пионирох и дзешец екипи у катеґориї сениорох.
Шицки екипи у обидвох пионирских катеґорийох з Руского Керестура, док ше у конкуренциї сениорох змагаю седем домашнї, та по єдна фодбалска екипа з Крущичу, Кули и Червинки. Екипи сениорох подзелєни до двох ґрупох.
Змаганя на Ноцним турнире ше отримує на рукометним стадионє у Старей школи, починаю на 20 г. зоз змаганями пионирох, а кажди дзень буду и по два змаганя сениорох, хтори починаю коло 21 годзин.
Уходнїца на Турнир 30 за дзеци и 50 дин. за старших, а уходнїца источашнє и томбола за публику, хтору дарую велї спонзоре. Соботами на Турнире шлєбодни дзень.