НОВИ САД – Тогорочни 82. Медзинародни польопривредни саям почина нєшка и тирва по 15. май, а за тоти днї на Сайме свойо продукти и услуги представя 1 500 викладаче зоз 60 державох. Саям нєшка отвори министер финансийох Душан Вуйович.
Орґанизаторе наявели традицийну виставу польопривредней механїзациї, на хторей буду представени найсучаснєйши машини и опрема, як цо то комбайн за цукрову цвиклу хтори кошта пол милиона еври, лєбо трактор за 250 000 еври, рижни саднїци, репроматериял и друге.
На Националней вистави статку буду представени 1 300 расни гарла, а 14. мая будзе означени и Дзень статкарох. Саям понука и Виставу орґанских продуктох, та продуктох з ознаку ґеоґрафского походзеня, а з нагоди наиходзацого початку применьованя Закона о предшатвовим финансованю, будзе отримана и трибина з тоту тему.
Саям нєшка будзе отворени на 11 годзин, а други днї капури Сайму за нащивительох отворени од 9 до 19 годзин. Уход 500 динари, а за ґрупи у хторих вецей як 15 особи уходнїца 350 динари. Школяре, студенти и пензионере колективну нащиву буду плациц 200 динари, як и дзеци младши од 12 роки.
На ютре, на нєдзелю, на Сайме будзе ткв. Фамелийни дзень, кеди родичи з дзецми до 16 роки годни нащивиц Саям так же купя лєм єдну уходнїцу за 500 динари.