НОВИ САД – Тих дньох будзе познате точне число уписаних студентох на перши рок основних и интеґрованих студийох у юнийским конкурсним терминє, та на основу того и число шлєбодних местох у септембру.
Дзепоєдни факултети уж обявели тоти податки, та так на Академиї уметносцох на буджет уписани 130 студенти, а остало ище 9 места на буджету и штири места на самофинансованю.
На Факултет спорту и физичного воспитаня (ДИФ) уписали ше 267 студенти, а остало 133 места за студентох котри ше буду школовац о своїм трошку. На Педаґоґийни факултет уписани вєдно 104 студенти, та остало 16 буджетски места и 115 места на самофинансованю.
Понеже число местох на буджету преширене, Природно-математични факултет ище нє обявел конєчну лїстину, та нєшка будзе преволованє кандидатох же би ше пополнєло места на самофинансованю. Подобна ситуация и на других факултетох, а упис и преволованя ше окончує по розпорядку яки принєсли управи факултетох.
У 2015/2016. року на факултетох Универзитету у Новим Садзе єст места за 9 112 бруцошох, з того ше 5 220 буду школовац о трошку держави, а 3 892 ше буду финансовац сами.