РУСКИ КЕРЕСТУР – У парохиї св. оца Миколая вчера предлужени роботи на ушореню велькей Виронаучней сали, а з тей нагоди поставяна вонкашня изолация зоз стиропору.
Добродзечнє робели даскельо члени Церковного одбору (ЦО) як и други парохиянє, пензионовани майстрове. Як Рутенпрес дознава од предсидателя ЦО Михайла Рамача, одборци далєй планую салу обилїц зоднука, а познєйше закончиц и саму фасаду.
Най здогаднєме, нєдавно на сали заменєни облаки и дзвери, а шицко ше тото роби же би ше парохию пририхтала за наиходзацу преславу преглашеня Епархиї, хтора у Керестуре будзе 19. мая.
Понеже потерашнї роботи поробени на кредит, бо ше одвит на конкурсох достава познєйше, парох о. Михайло Малацко поволал тих цо можу и сцу финансийно участвовац у тих трошкох. Поготов же пре тоту нагоду єст ище вельо роботи котри би требало поробиц, и у цо красшим амбиєнту дочекац вельо госцох и обезпечиц голєм за єдно число и прикладне змесценє на парохиї.
