ВЕРБАС – Заменїк предсидателя Општини Вербас Милан Ґлушац вовторок, 10. новембра, у Беоґрадзе представел роботу локалного Совиту за безпечносц, а його дїлованє оценєл як ефикасне. Вербас на тей конференциї представял и началнїк Полицийней станїци Владо Ґлодьович.
Презентацию на конференциї „Локални совити за безпечносц” орґанизовали ОЕБС, Министерство нукашнїх дїлох, Министерство за державну управу и локалну самоуправу, члени Стаємней конференциї городох и општинох, а отримана є у Сава Центру.
Министер нукашнїх дїлох Небойша Стефанович з тей нагоди визначел же значне же би гражданє мали довирия до полициї, а вона то муши заслужиц з одвичательну роботу.
У двацецминутовей презентациї активносцох витворених пре злєпшованє безпечносци гражданох у вербаскей општини, Ґлушац здогаднул же Совит за безпечносц основани 28. януара 2005. року, а його задаток розпатрац и виучовац конкретни питаня вязани за превенцию безпечносци на подручу општини Вербас.
На конференциї Ґлушац представел и даскельо акциї хтори у предходним периодзе отримани у местох општини Вербас, а през сотруднїцтво полициї, локалней самоуправи и гражданох.