КОЦУР – Представителє парохиї Преображеня Господньго зоз Шиду, на чолє з парохом и деканом сримским о. Михайлом Режаком, вчера нащивели парохию и церкву Успения Пресвятей Богородици у Коцуре.
Шидянє парохови о. Владиславови Рацови, о. Яковови Куличови и предсидательови Церковного одбору проф. др Михайлови Фейсови и його заменїкови Миколови Русковскому повинчовали вельки ювилей – 250-рочнїцу церкви у Коцуре.
З тей нагоди Сримци Коцурцом на дарунок придали малюнок „Крачунски венєц”, малярки Ясни Арбанас зоз Сримскей Митровици, з тогорочней Подобовей колониї „Руски двор 2015”, а домашнї им подаровали моноґрафию видату з нагоди ювилею.
Окрем пароха о. Режака, у делеґациї Шидянох були члени Церковного одбору Владимир Торма и Владимир Дїтко, як и представителька Старших шестрох и парохиянкох котри ше стараю о прикрашованю церкви Евґения Данчо и Андєлка Михняк.
Домашнї и госци бешедовали о активносцох у своїх парохийох, а потим нащивели церкву и Етно-клуб „Одняте од забуца”.
