КУЛА – Вчера у Кули премиєрно виведзена дзецинска представа „Маче, любим це як цо качка льби каче” Роберта Такарича, у режиї Александри Лендєр з Вербасу, а у продукцию Руского КУД „Др Гавриїл Костельник”. Представа була у Културним центре Кула.
Наймладши аматере Дружтва ше добре указали, тема представи присподобена їм основношколскому возросту, а режисерка Лендєрова задовольна як ше дзеци знашли и визначела же добре одробели свою часц роботи. Окреме подзековала Амалиї Ковачовей, котра преложела текст на руски и на каждей проби помагала у роботи з дзецми.
Предсидатель КУД „Др Гавриїл Костельник” Владимир Бучко гварел же снованє дзецинскей драмскей секциї часц плану роботи Дружтва за тот рок, а з тоту представу Дружтво будзе участвовац на Општинскей смотри дзецинскей театралней творчосци у Крущичу и на Драмским мемориялє у Керестуре.
Представу ше рихтало коло мешац и пол, а ґлумя Дияна Канюґа, Филип Канюґа, Мирослав Стричко, Желько Стричко, Себастиян Гарди, Весна Вонич и Лїляна Кнежевич.
