ВЕРБАС – Вчера, 20. октобра, преславени Дзень општини Вербас и Дзень ошлєбодзеня у Другей шветовей войни, а цалодньова програма почала з кладзеньом венцох на памятнїк на городским теметове, потим на памятнїк Площа Червеней армиї, як и на Памятнїк погинутим борцом у центре городу, дзе отримана и културно-уметнїцка програма.
З нагоди Дня Општини отримана и Шветочна схадзка Скупштини општини (СО) Вербас, на хторей бешедовали предсидателька СО Вербас Маряна Мараш и предсидатель Општини др Братислав Кажич.
Попри гражданох, одборнїкох и представительох Општини, на Скупштини були и представителє вирских заєднїцох, политичних партийох, Богдан Кост з Амбасади України, Миодраґ Драґан Канкараш з Конзулату Чарней Гори, як и представителє велїх општинох, медзи нїма Србобрану, Малого Идьошу, Темерину, Кули, Бечею.
Того року Награду Општини Вербас достали єден з власнїкох Польопривредного подприємства „Сава Ковачевич” Дьока Вуїчич, ОШ „Бранко Радичевич” зоз Савиного Села и, постгумно, културни роботнїк и писатель Слободан Елезович.
Културно-уметнїцку програму у сали Биоскопу виведли Городски хор „Бачки шпиваче” и члени Драмско-рецитаторского студия Културного центру Вербас. Означованє Дня општини закончене з отвераньом подобовей вистави „Єшеньски подобови салон 2015” у Ґалериї Културного центру Вербас.
