ВЕРБАС – На вчерайшей схадзки Скупштини општини Вербас (СО) прилапени ребаланс буджету, хтори место першобутно проєктованого на 1,43 милиярди динари, тераз виноши 1,86 милиярди динари.
Крем о ребалансу, длугшу розправу виволал и Звит о витворйованю општинского буджету за перши тогорочни шейсц мешаци, а дньови шор бул преширени з трома точками, так же вчера розпатрани 16 точки и прилапени по нїх одлуки. Медзи нїма и Одлука о приношеню плану детальней реґулациї блоку 26 у Вербаше.
Одборнїки одлучовали и о кадрових питаньох, та на вчерайшей схадзки за нового директора ЯП за превоз путнїкох „Вербас” меновани Велько Ковачевич, понеже дотерашнї директор того Подприємства Милан Милич задзековал. Ковачевич дотераз бул помоцнїк предсидателя Општини, а його функцию тераз превежнє Милич. Ґу тому, за директора Явней аґенциї за зоогиґиєну меновани Марко Дюркович.
После 15 рокох то була перша схадзка СО хтора нє преношена директно – прейґ радия, лєбо телевизиї, цо було єдно зоз замеркованьох одборнїкох опозициї, хтори наявели протест кед ше убудуце схадзки СО нє будзе емитовац прейґ електронских медийох.