НОВИ САД – Национални совит (НС) Руснацох на своєй другей порядней схадзки у новим зволаню, отриманей всоботу, 6. децембра у Заводзе за културу войводянских Руснацох у Новим Садзе, прилапел Статут Националного совиту Руснацох, приспособени новому Закону о националних совитох, як и Дїловнїк о роботи.
На схадзки присуствовали 18 з 19 членох Совиту и у конструктивней и вичерпней дискусиї, у хторей участвовали вецей члени Совиту з рижних опцийох, детально анализовани Нарис статута НС совиту Руснацох, прецизнєйше дефиновани його одредзеня, же би були присподобени законскей реґулативи и найвекша часц суґестийох унєшена до конєчного документу, хтори потим вигласани єдногласно.
Окреме розправяне о правох и обовязкох функцийох хтори Закон нє одредзує, а Нарис статута их учишлює до структури НС, як цо то подпредсидателє и секретар Совиту. Тиж и о задлуженьох Вивершного одбору, хтори заменює скорейши Вивершни орґан и по новим Закону достава векши овласценя, та його члени муша буц и члени Националного совиту.
Попри штирох главних одборох хтори предписує Закон – за културу, образованє, информованє и службене хаснованє язика и писма – з новим Законом, та вец и зоз Статутом, мож основац роботни цела, лєбо пододбори у каждим зоз спомнутих одборох, а и сами роботни цела можу мац пододбори по обласцох, хтори ше тиж буду волац „одбори”.
Так, у Одборе за службене хаснованє язика и писма будзе формовани Одбор (пододбор) за демоґрафию, а одлучене и же як окремне роботне цело будзе формовани Одбор за управу и предписаня. Дотерашнї Одбор за младеж и спорт будзе роздзелєни на два окремни роботни цела – Одбор за младеж и Одбор за спорт, а будзе основани и Одбор за науку, хтори робел и у скорейшим зволаню Совиту.
Кед слово о Дїловнїку о роботи, на инициятиву вецей членох НС одлучене же би ше, пре очуваня явносци у роботи, убудуце тонски знїмало и телефонски схадзки, а гласанє потвердзовало и електронски – з ес-ем-ес поруку. Одредзене же о хторих компетенцийох НС нє годно одлучовац на телефонских схадзкох.
Найвекша розправа водзена о институту тайного гласаня, понеже було становиска же тайне гласанє загрожує явносц у роботи НС. З дзешец гласами „за”, вигласане же НС Руснацох будзе мац и тот инструмент демократиї.
