БЕОҐРАД – Транспортна полиция уведла нови критерий – кажди вожач од тераз будзе препатрени на алкотесту, без огляду чи є застановени пре даяке потупенє, лєбо у порадней контроли у транспорту. Алкотести достали шицки полицийни патроли у Сербиї – виявел вчера началнїк Управи транспортней полициї Владимир Ребич.
По його словох, то практично значи же кажди застановени вожач – чи пре нєзавязани пас, пре нєдопущену швидкосц, нєправилне обегованє, лєбо пре порядну контролу – достанє и алкотест.
Кед же полиция утвердзи же вожач з превозку управя под дїйством алкоголу, вец ше утвердзи точне количество алкоголу у орґанизму, з чим транспортна полиция будзе мац звекшани активносци одкривац транспортни потупеня у воженю под дїйством алкоголу.
Ребич гварел же лєм вчера 400 вожаче виключени з транспорту пре тоту причину, а на рочним уровню зопру коло 50 000 вожачох под дїйством алкоголу.