РУСКИ КЕРЕСТУР – Понеже зоз зомборского „Сомболеду” нє явели же зменшали квоти за одкуп млєка, позавчером на керестурским одкупним месце у „Юарбису” вжати лєм 400 литри млєка, а було коло 1 060 литри, дознава Рутенпрес.
Остаток млєка ше чува на одкупним месце у складзе з предписанима стандардами, а шицким продуковательом млєка у Керестуре з одкупней станїци явене же би, до дальшого, нє ношели млєко. Тиж, продуковательом будзе явене кеди ознова почнє одкуп млєка, а назадаваю ше же то будзе о дзень-два.
„Сомболед” по млєко до Керестура приходзи кажди други дзень, а дньово ше у валалє придава по коло 550 литри млєка. Як гварели на одкупним месце, подобни случаї були и прешлого року, та праве вчера кончени розгварки и з дзепоєднима другима одкупйовачами, же би млєко нє оставало у валалє. Резултати тих розгваркох буду познати о даскельо днї.