РУСКИ КЕРЕСТУР – Проблем з плаценьом дополнююцих роботох на законченю школско-спортскей гали у Руским Керестуре Месна заєднїца (МЗ) будзе ришовац з Фондом за капитални укладаня Войводини, як финансиєром роботох, догварене на остатнєй схадзки Совиту МЗ.
До МЗ, хтора ше водзела як инвеститор роботох, а финансовал их спомнути Фонд, нєдавно сцигло опомнуце пред тужбу од адвоката подприємстав „Яворник” зоз Суботици же є нєвиплацене за дополнююци роботи у гали, у висини коло 5 милиони динари.
Як на схадзки Совиту штварток, 11. децембра, потолковал бувши секретар МЗ Йоаким Надь, при закончованю гали, орґан за надпатранук роботох наложел же би ше поробело ище дзепоєдни роботи хтори нє були предвидзени з догваренима, а пре пременку закона, Фонд нє могол розписац явну набавку, алє одлука о виводзеню роботох принєшена на Управним одборе Фонду и о тим нєт контракту з виводзачом роботох.
– Було би нєкоректно з боку Фонду за капитални укладаня же, кед дал согласносц на тоти дополнююци роботи, же би их нє виплацел. Надпатраюци орґан подписал исправносц поробеного, а МЗ нє подписала нїяку согласносц же ма виплациц тоти дополнююцци роботи – гварел Надь.
На схадзки Совиту порадзене же предсидатель Совиту Владимир Олеяр и о.д. секретара МЗ Юлин Медєши, у сотруднїцтве з покраїнским посланїком Славком Рацом, пойду на розгварку з директором Фонду за капитални укладаня Войводини, пре винаходзенє способу за ришенє того проблему.