БИКИЧ – Културно-просвитне дружтво (КПД) „Иван Котляревски” и Секция Дружтва за руски язик, литературу и културу, вчера у ОШ „Сримски фронт”, єй Подручним оддзелєню у Бикичу орґанизовали пригодну програму з нагоди означованя 106- рочнїци народзеня Михала Ковача, писателя и першого учителя у Бикичу.
З тей нагоди ше през биоґрафски податки, як и Ковачову поезию, Бикичанє здогадли на свойого першого учителя, хтори и основал школу у Бикичу пред початком Другей шветовей войни.
У програми наступели школяре котри руски язик з елементами националней култури виучую як виборни предмет, а за музичну часц була задлужена Женска жридлова шпивацка ґрупа „Бикичанки”, як и Мишана шпивацка ґрупа КПД „Иван Котляревски”.
Спред Дружтва за руски язик, литературу и културу на учителя Ковача здогадла Ирина Папуґа, як и учителька у пензиї Драґица Живкович Лела, хторей за тоту нагоду орґанизована и вистава малюнкох.
