РУСКИ КЕРЕСТУР – Вирни керестурскей парохиї вчера преславели швето старозавитного пророка Илиї, а найшветочнєйше було на Велькей Служби Божей у Водици на 10 годзин, хтора була барз нащивена.
Службу предводзел домашнї капелан о. Михайло Шанта, котри и наказовал о живоце пророка Илиї. а сослужел и пред тим споведал капелан з Кули о. Платон Салак ЧСВВ. На часци представяня путуюцей икони ш. Йосафати Гордашевскей бул присутни и парох о. Михайло Малацко.
Путуюцу икону блаженей шестри Йосафати шестри Служебнїци шветочно принєсли пред Службу Божу пред олтар Водицовей лєтнєй каплїци, а по Служби представели духовни аспекти живота своєй сновательки.
Як наглашела ш. Михаила, путуюца икона з ориґиналнима мощами блаженей обиходзи шицки провинциї ш. Служебнїцох по швеце, а з нагоди 125-рочнїци снованя їх заєднїци, хтору ше будзе означовац наступного року.
Потим шестри предводзели молитву Ружанца до ш. Йосафати, а на концу шицки присутни могли поциловац икону, з мощами блаженей.
Икона по шлїдуюцу нєдзелю будзе у манастире ш. Служебнїцох у Керестуре, дзе ю годно поциловац кажди дзень од 9 до 17 годзин.
