БЕОҐРАД/НОВИ САД – Подприємство „ЕУ робота” („ЕУ посао”) з Банялуки порушало перши портал за пренаходзенє роботи у Европскей униї, насампредз у Нємецкей – www.euposao.de на хтори можу конкуровац гражданє Сербиї, Босни и Герцеґовини и Чарней Гори. Тераз на порталє єст коло 350 активни оглашки на хтори ше мож приявиц безплатно.
Представяюци портал у Беоґрадзе, директор „ЕУ робота” Андрей Росич потолковал же циль порталу нє „одлїв мозґох”, алє олєгчац людзом котри би, пре нєдостаток роботи у своїм штредку, вшелїяк глєдали роботу у иножемстве. Позитивне же на тот способ людзе буду леґално доходзиц до роботи.
Безплатно мож достац и информациї о програмох и условийох студираня, усовершованя и волонтираня у державох ЕУ у новоотвореней Информативней канцелариї Европскей униї у Новим Садзе – ЕУ инфо-куцик. Ту и други рижни публикациї за одроснутих, та прилагодзени дзецом, доступни на сербским, мадярским, румунским. словацким, английским, нємецким и французким язику.
ЕУ инфо-куцик ше находзи на Булеваре Михайла Пупина ч. 17, през тидзень роби од 10 до 19 годзин, а соботу од 10 до 15 годзин.