ДЮРДЬОВ – У Основней школи „Йован Йованович Змай” у Дюрдьове вчера означени два ювилеї ґимназиї по руски – 70 роки першей рускей Ґимназиї у Руским Керестуре и 45 роки другей, терашнєй Ґимназиї у тим нашим месце.
Присутних привитала наставнїца руского язика у дюрдьовескей Школи Мария Самарджич, а школяром з руских оддзелєньох 7. и 8. класи преподаванє о рочнїцох отримала професорка педаґоґиї Ирина Папуґа, тиж и у мено Дружтва за руски язик, литературу и културу, як орґанизатора преподаваня. Папуґова бешедовала о початкох першей рускей Ґимназиї, на яки способ и хто участвовал у єй снованю, яки були преподаваня у нєй, алє и з якима ше проблемами стретали заняти у школи.
Представяюци рочнїцу другей, на чиїх основох и терашня Ґимназия у Керестуре, Папуґова наглашела же то єдина штредня школа у хторей ше мож школовац на руским язику, а источашнє и пребувац у интернату Школи „Петро Кузмяк”. На вчерайшим стретнуцу Папуґова бешедовала и своєй кнїжки „Руска Просвита у Бачинцох”, як и о моноґрафиї „Двасто пейдзешат роки образованя у Руским Керестуре”.
На преподаваню була и директорка дюрдьовскей Школи Мария Тртич, котра закончела спомнуту Ґимназию и з тей нагоди гварела же єй то були найлєпши роки школованя, як и же интернат за школярох наисце добре ушорени и красни.
На преподаваню визначени и мена учительох, наставнїкох, священїкох и других наших преднякох з Дюрдьова котри ше школовали у рускей Ґимназиї.