СРИМСКИ КАРЛОВЦИ/ШИД – Орґанизаторе „Русин Филм Фесту”, хтори початком октобра перши раз отримани у Шидзе, прешлого викенду, од 21. по 23. октобер участвовали на 10. Филмским фестивалє документарного филму „Бродзенє души” („Bdenje duše”/„Vigil of Soul”) у Сримских Карловцох. Тот Фестивал медзинародного характеру орґанизує Здруженє филмских и телевизийних роботнїкох Войводини и ПП „Фикс фокус” з Беоґраду, а у сотруднїцтве з Општину Сримски Карловци, епархию Сримску, Музейом Сримских Карловцох, Богословию и Туристичну орґанизацию Сримских Карловцох.
Спред „Русин Филм Фесту” на Фестивалє у Карловцох присуствовали його директорка Саня Тиркало, предсидатель Реґионалного одбору Рускей матки за Срим Владимир Джуня, член Орґанизацийного одбору „Русин Филм Фесту” Душан Теодорович, началнїк Општинскей управи Шид Ромко Папуґа и академски маляр зоз Шиду Янко Кукучка, а одход потримала Општина Шид.
Внєдзелю, 23. октобра, Саня Тиркало на Фестивалє у Сримских Карловцох представела медзинародни „Русин Филм Фест”, а з тей нагоди емитовани и филм з того фестивалу „Траґедия галицкей Руси”.
Под час нащиви у Карловцох представителє „Русин Филм Фесту” бешедовали з филмскима роботнїками зоз Сербиї и иножемства, медзи нїма и з представителями познатого филмского фестивалу зоз Самару у Русийскей Федерациї, хтори понукли сотруднїцтво и жаданє же би идуцого року нащивели „Русин Филм Фест”.
Перши „Русин Филм Фест” отримани у Шидзе 1. и 2. октобра, у орґанизациї Шветового Конґресу Русинох/Руснацох/ Лемкох и Реґионалного одбору Рускей матки за Срим, а як поведзене на Фестивалє у Карловцох, одгукнул и у нашей жеми, и поза єй гранїци.