КУЛА – Скупштина општини (СО) Кула вчера, 16. юлия, прилапела Звит од дїлованю за 2014. рок Явно-комуналного подприємства (ЯКП) „Руском” з Руского Керестура, дала согласносц на Одлуку о розподзельованю добитку, а принєшене и Ришенє о даваню согласносци на вименки и дополнєня Програми дїлованя „Рускому” за тот рок.
Пред одлуками на схадзки СО, шицки спомнути акти розпатрал Надпатраюци одбор „Рускому, а наймладше ЯКП у кулскей општини у прешлим року вєдно витворело приходи од прейґ 34 милиони динари, а розходи були дацо вецей як 32 милиони. По законуюцим рахунку витворени добиток од дацо вецей як 2 милиони 200 000 динари, з хторого 20 одсто – дацо вецей 442 600 динари будзе уплацени сновательови – Општини Кула, а остаток будзе унапрямени на чечуце дїлованє „Рускому”.
СО Кула вчера прилапела и Програму хаснованя буджетскей помоци – субвенциї „Рускому” у тим року, у цалосним висини 13 милиони 700 000 динари. Як на схадзки СО гварел директор „Рускому” Иґор Фейди, по Конкурсу Покраїнского секретарияту за польопривреду, водопривреду и лєсарство, Општини Кула одобрени 10 милиони 536 000 динари за виробок построєня за дезинфикованє води за пице з мишаним дезинфикантом випродукованим з процесом електролизи водовей розпущенїни солї на жридлу водоводу у Керестуре, односно за набавянє ткв. хлороґен- построєня.
Попри з Покраїни, у инвестициї з 20 одсто участвує и Општина Кула, зоз 2 милиони 534 000 динари, а ПДВ виплаци „Руском”.
Хаснованє и динамика трошеня тих средствох субвенциї буду дефиновани з Контрактом медзи предсидательом Општини Кула и директором ЯКП „Руском”.