РУСКИ КЕРЕСТУР – Перша роботня другого циклусу театралних роботньох под назву „Театер на дланїˮ, отримана всоботу, 24. октобра у Дядьовей роботней сали Дома култури у Руским Керестуре.
Слово о циклусу театралних роботньох у реализациї Руского народного театру „Петро Ризнич Дядяˮ, хтори ше запровадзує уж други рок, а хтори наменєни дзецом основношколского возросту.
На першей роботнї участвовали дзеци од пиятей по осму класу основней школи. Роботнї водзели искусни ґлумци аматере Мирослав Малацко и Ребека Вукосав, хтори през интересантни бависка и креативни практични задатки, дзеци упознали зоз театром.
Програма почала зоз бависками упознаваня, а потим ушлїдзели вежби концентрациї хтори през шмих и франту порушали повагу и сотрудзованє медзи учашнїками. Дзеци ше занїмали и зоз трему и явним наступом, а у єдней роботнї єдни другим були и „скулптуриˮ и так виглєдовали рух, положенє цела и можлївосци нєвербалного виражованя. През рижни задатки и ситуациї учели як препознац розлики медзи драму и комедию.
Директор Руского народного театру „Петро Ризнич Дядяˮ, Славко Орос, визначел же му окреме мило же ше проєкт реализує други рок за шором и же медзи дзецми постої велька заинтересованосц ґу роботньом. По його словох, проєкт ма вецейнїсте значенє, бо дзеци, окрем же так упознаваю театер, розвиваю интересованя ґу ньому, доставаю и нагоду упознац власни можлївосци и талант ґу ґлуми, а кед почувствую же их театер интриґує, можу остац у театре и надалєй участвовац у реализованю його рижних проєктох.
По конєц тогорочного, другого, циклусу у наиходзацих двох викендох, 31. октобра и 7. новембра, буду отримани ище два роботнї.
