ВЕРБАС – У привитней бешеди на Шветочней академиї з нагоди Националного швета Руснацох у Вербаше заменїк предсидателя Општини Вербас Милан Ґлушац наглашел же Вербащанє вше з пиху визначую же су национално мишани штредок, дзе у медзисобним почитованю вєдно жию припаднїки 26 националних заєднїцох, чий соживот будовани велї роки.
– Праве рижнородносц и квалитет културней творчосци наших гражданох рижних нацийох и вирох нашо найвекше богатство и вредносц хтору локална самоуправа у Вербаше з окремну увагу чува, помага и потримує – гварел заменїк предсидателя Општини Вербас Милан Ґлушац.
Ґенерални секретар предсидателя Републики Сербиї Неделько Теньович, котри сход привитал у мено предсидателя Томислава Николича, визначел же од присельованя Руснацох по нєшка отримана традиция пестованя и чуваня националней култури и идентитету, а Руснаци у Сербиї и Войводини нєшка препознатлїва и почитована национална заєднїца, насампредз дзекуюци и доприношеню хторе єй визначни припаднїки даваю у уметносци, науки и других обласцох живота и творчосци.
Подпредсидатель Народней скупштини Републики Сербиї Иґор Бечич гварел же войводянски Руснаци, после 270 рокох живота на тих просторох, дзе їх национална припадносц и язик припознати, Сербию тримаю за свою державу, а у исти час су вяза Сербиї з державами штреднєй и восточней Европи, дзе их историйни коренї и дакедишня оцовщина.
– Днї як Националне швето Руснацох служа же бизме ше познали баржей, жили вєдно, а нє єдни коло других – заключел Бечич.
Амбасадор Словацкей у Београдзе Ян Вашо, котри з тей нагоди бешедовал по шаришски, понеже му, як гварел, мац зоз Шаришу, визначел же вельки успих же ше руска, словацка и други национални заєднїци у Сербиї отримали так длуго у мултинационалним и мултиконфесийним окруженю. Визначел же у Словацкей активна русинска национална заєднїца, хтора отримує блїзки вязи з Руснацами у Сербиї.
Сход привитала и одправнїк роботох у Амбасади України у Беоґрадзе Євґения Филипенко, котра здогадла же перши приселєнци на тоти простори пришли зоз найзаходнєйшого реґиону нєшкайшей України – Закарпатя и, винчуюци швето, у мено Амбасади шицким пожадала здравя, миру и у жеми и у фамелиї, виру и надїю.
Подпредсидателька Скупштини АП Войводини Ана Томанова Маканова, котра и предсидателька Националного совиту Словацох у Сербиї, гварела же после телїх рокох заєднїцкого живота на тих просторох два заєднїци блїзки, же дзеля исти почежкосци, алє ше тиж вєдно и радую и славя свойо швета.
– Животни проблеми нєшка дзелїме зоз шицкима гражданами Сербиї, алє ми маме ище єдну велькиу обовязку – нє забуц дзе нам коренї и, як и ґенерациї пред нами, чувац културу и идентитет за ґенерациї хтори приду после нас – гварела Томанова Маканова у Вербаше.
