У рускей редакциї Оддзелєня Заводу за учебнїки у Новим Садзе однєдавна роби нова редакторка за руски язик – Гелена Папуґа. Вона медзи иншим, од тераз будзе задлужена остарац ше же би ше учебнїки на руским язику пририхтало, сполнєло видавательни план, и цо лєпше координовало медзи прекладателями и авторами.
Окрем порядних учебнїкох за основну и штредню школу и школскей лектири хтори Завод понука, за нови школски рок з друку вишли нови учебнїки.
– По видавательним плану зме мали видац двацец учебнїки, и вони маю буц готови по початок нового школского 2015/2016. року. Од того седем нови кнїжки: Природа и дружтво и Виглєдованка за штварту класу (комплет), Збирка задаткох зоз математики за пияту класу, Роботна тека за ґеоґрафию за шесту класу, Ґеоґрафия (учебнїк), за седму класу, Физика, учебнїк и Збирка задаткох зоз хемиї тиж за седму класу. То найновши кнїжки, перше виданє, хтори прекладали Мелания Римар, Мария Дудаш, София Николаєвич и Евґениє Медєши и Зденка Рускаї.
По перши септембер буду порихтани и Музична култура за штварту класу авторки Лидиї Пашо, Швет коло нас и Роботна тека за предшколски дзеци, Ґеоґрафия за пияту класу и Роботна тека за биолоґию за шесту класу, за школярох седмей класи ше ище чека на Збирку задаткох з математики, Роботну теку з ґеоґрафиї, и Збирку задаткох зоз физики, а ма буц готова и Роботна тека за технїчне и информатичне образованє, як и Роботна тека за биолоґию за осму класу – гвари Папуґова.
Вецей як половка учебнїкох од тих хтори ище нє вишли, а заплановани су, одобрени, и лєм цо нє вошли до друку, та ше редакторка наздава же по початок школского рока, шицки кнїжки буду порихани. Вона гвари же у видавательним планє стал и учебнїк з Музичней култури за седму класу, авторки Лидиї Пашо, алє пре длугу процедуру доставаня согласносци за друкованє, тота ориґинална кнїжка видзе аж нарок.