МИКЛОШЕВЦИ – На соботу и нєдзелю, 29. и 30. авґуста, у Миклошевцох, у Горватскей, будзе ювилейна, 30. Културна манифестация „Миклошевци 2015”.
Манифестация на соботу почнє на 19 годзин з отвераньом вистави трох младих подобових уметнїкох – Кристияна Медєша, Лариси Гнатко и Роберта Ерделя з Петровцох.
Исти вечар будзе програма на спомин миклошевского композитора Юлияна Бучка, з назву „Лєм писня будзе далєй жиц”, на хторей буду виведзени його авторски шпиванки.
На нєдзелю, 30. авґуста, на 11 годзин у миклошевскей грекокатолїцкей церкви будзе Служба Божа, а потим отверанє етноґрафскей музейскей збирки.
Пополадньова нєдзельова програма „Поздрав ровнїни” на „Миклошевцох 2015” почнє на 15 годзин, а наявене участвованє шицки руских културно-уметнїцких дружтвох з Горватскей.
Внєдзелю у Миклошевцох наступя шпивацки и танєчни ґрупи руских КУД зоз Заґребу, Осиєку, Вуковару, Винковцох, Петровцох, Раєвого Села, Миклошевцох, як и госцюци горватски и мадярски дружтва зоз сушедних местох.
Орґанизатор Културней манифестаци „Миклошевци 2015” домашнє КУД „Яким Ґовля”, а з финансийну помоцу Совиту за национални меншини Републики Горватскей, Општини Томповци и Союзу Русинох Горватскей.
