ЗОМБОР/РУСКИ КЕРЕСТУР – После участвованя на Окружним змаганю Спортскей олимпияди основних школох Войводини (СОШОВ), односно на Першенстве Войводини у атлетики, тройо атлетичаре з Руского Керестура виборели пласман на финалне змаганє.
На Окружним змаганю, хторе отримане стреду, 27. мая у Зомборе, ОШ „Петро Кузмяк” мала 15 змагательох у вецей возростох (од 2. по 6. класу), а з освойованьом першого места, на финалне змаганє ше пласовали Кристина Катона у скаканю до висока и Микола Папуґа у обегованю на 60 метери, обидвойо у конкуренциї 6. класох, як и Алексей Бики у скаканю до далєка, котри освоєл друге место у конкуренциї 4. класох.
Кристина Катона и Микола Папуґа на тим змаганю у Зомборе посцигли и свойо нови особни рекорди, понеже Кристина прескочела палїцу на 1,47 метери, а Микола 60 м пребегнул за 8,28 сек.
У зависносци од возросней катеґориї, млади атлетичаре ше змагали у руцаню вортексу, обегованю на 60, 300 и 600 м, скаканю до далєка, скаканю до висока и у руцаню кулї.
Финалне змаганє СОШОВ будзе у Новим Садзе 4. юния.