Туризем у шидскей општини велька розвойна шанса

автор влд
1k Опатрене

Розвой акцентовани на єднодньових вилєтох прето же у Шидзе нєт условия за длугше змесценє и затримованє туристох, и дата потримовка класификованю туристичних манифестацийох до трох катеґорийох.

Туристични можлївосци шидскей општини ище нєдосц вихасновани у смислу заробку, а на нєдавно отриманим 39. Медзинародним сайме туризма у Беоґрадзе, општина Шид добре представела свойо туристичне понукнуце на штанду шицких осем општинох Сриму под назву „Диван є кичени Срем”. По словох директорки Туристичней орґанизациї Шид, Кристини Радосавлєвич, на Сайме нащивительом представени и два значни туристични манифестациї – ,,Сримски пастирски полудзенок”, хтори ше отримує, звичайно, блїзко при Бачинцох, як и „Сримска куленияда”у Ердевику.

– Остарали зме ше же бизме манифестацию „Сримски пастирски полудзенок” презентовали прейґ краткого споту, флаєрох, а тиж зме предсатвели и як ше лупа чутки кукурици, цо єдне зоз змаганьох на спомнутей манифестациї. Тиж зме оможлївели нащивительом коштовац овчи паприґаш, хтори ше традицийно вари на тей манифестациї. Таке презентованє виволало зацикавеносц нащивительох на Сайме – гвари директорка Радосавлєвич.

Тиж представена и манифестация „Сримска куленияда”, а на штанду бул понукнути кулен, фрушкогорски вина и мед з лїпи хтори продукую пчоларе з Ердевику. Директорка додава же є задовольна зоз наступом на сайме и контактами зоз туристичнима аґенциями. По єй словох у дальшим розвою туризма, напрям будзе на розвою єдньодньових вилєтох, понеже нєт капацитети за змесценє госцох на ноцнїк хтори приходза на єдним, або и двох автобусох.

– Ми ше закладали же бизме розвивали таки способ туризма у сотруднїцтве з другима општинами Сриму як цо наприклад Рума, Индїя або Стара Пазова. Госци би там були змесцени, а вец би приоходзели на єднодньови вилєт и нащивйовали туристични места у шидскей општини. Туристом би могло понукнуц же би кажди дзень нащивели другу општину у Сриме – заключує Кристина Радосавлєвич.

Наша собешднїца гвари же потримує идею туристичних роботнїкох хтори ше закладаю же би туристични манифестациї були роздзелєни до трох катеґорийох по значеню на державним уровню, потим же кельо туристох-госцох манифестация прицагнє, кельо ше зароби пенєжи и кельо медиї провадза одредзену манифестацию. 09 KRISTINA RADOSAVLJEVIC_DIREKTORKA TOSРадосавлєвичова спомина же манифестация муши понукнуц дацо нове и нєзвичайне же би прицагла туристох, бо у Сербиї маме надосц  рижни „ияди” хтори менєй-вецей здабу єдна на другу, а место туристох и заробку, позбера ше лєм локалне жительство.

Окрем уж спомнутих манифестацийох, „Сримски полудзенок пастирски” и „Сримскей куленияди”, директорка ТОШ-а визначує и други препознатлїви манифестациї у шидскей општини як цо „Сримска забивачка и колбасияда” и „Мото стретнуце” на Лїповачи. У тим поглядзе замерковани и спортски манифестациї як цо то МТБ шидски маратон, потим обегованє бициґлистох „По улїцох Сави Шумановича”, и Новорочни маратон за шпациранє од центра Шиду по Фрушку гору.

ДРАЖКИ ЗДРАВЯ НА ЛЇПОВАЧИ

Општинска рада у Шидзе  прешлого тижня прилапела Програму дїлованя ТОШ-и за 2016. рок, а Кристина Радосавлєвич поинформовала членох Општинскей ради же обезпечени средства за проєктно-технїчу документацию за вибудов Дражки здравя на Лїповачи на Фрушкей гори.

– У прешлим 2015 року зме звекшали ноцованя за аж 52 одсто у одношеню на 2014. рок, алє то лєм статистика, и нє значи же зме мали вецей туристох. У питаню волонтере и члени рижних домашнїх и медзинародних гуманитарних орґанизацийох хтори ше стараю о миґрантох – обгрунтовала директорка Радосавлєвич.

ПОВЯЗАНИ ТЕКСТИ