ДЮРДЬОВ – У дюрдьовским хотаре тих дньох будзе закончена жатва жита, хтора почала коло 25. юния, алє ю претарговал моцни диждж, витор, аж и каменєц у єдней часци хотара блїжей ґу Жаблю, спрам Зренянину.
На початку тлачидби гектолитерска чежина зарна була коло 80, а тераз є коло 70 ґрами.
Перши одкоси давали и лєпши урожаї, медзи 3 и 5 тони по ланцу, а як гваря польопривреднїки, з каждим дижджом трацело ше коло 300 кили по ланцу, после моцних дижджох и витрох концом юния и вецей.
Жито у Дюрдьове предаваю на штирох местох – до „Дьорде Зличич” ДОО, Общей землєдїлскей задруґи „Чуроґ”, та Млїнох Суботин и „Брамар плус”. Перши два авансно плаца по 15 дин. за кґ, а други два спомнути млїни ище нє понукли цену жита.