РУСКИ КЕРЕСТУР – Внєдзелю, 29. мая у Спорскей гали, отримани перши медзинародни турнир у мини рукомету на котрим участвовали 12 екипи, з околних местох, з централней Сербиї и з Горватскей.
На турнире участвовала и домашня екипа, Рукометна секция Руски Керестур, котру тренира Славко Надь. Одбавени вєдно 18 змаганя, кажда екипа по три у своєй ґрупи, а домашня перше змаганє страцела од Илоку зоз 4:13, друге страцела од „Лакия” з Червинки зоз 6:15, а у трецим победзела екипу „Слован” з Руми зоз 6:5.
Циль тих мини турнирох нє тельо резултат, алє розвиванє любови ґу рукометному змаганю и виховйованє младих за будуцих рукометашох. Турнири, та и тот, потримує Рукометни союз Войводини чий секретар Иван Мандич на концу каждей екипи уручел плакети, а помогла му и наша преславена рукометашка-ґолман Злата Паплацко з Руского Керестура.
После змаганьох дзеци нащивели и мини золоґийну заграду у обисцу Звонка Гайдука, а тиж и нашу Водицу.
Орґанизатор турниру Славко Надь, а финансийно турнир потримали родичи и спонзоре з валалу, док по Надьових словох, у локалней самоуправи нє барз було слуха. Як визначел Надь, на тот способ сцело ше означиц и 60-рочнїцу рукомету у Руским Керестуре.
