ЗЕМПЛИНСКИ ТЕПЛИЦИ (СЛОВАЦКА) – Руснаци зоз Сербиї нєшка и на ютре участвую, односно присуствую на Пиятих Фолклорних шветочносцох „У Керестуре на пажици граю” у Земплински Теплицох у Словацкей, дакедишнїм Керестуре.
На поволанку орґанизатора, з виводзеньом своєй музики на Фестивалє на ютре участвує наш кантавтор Сашо Палєнкаш з Руского Керестура, котри наявени як „специялни госц” на манифестациї на хторей наступя иножемни виводзаче.
На поволанку старостки Општини Земплински Теплици Йозефини Угаловей, госц места и Фестивалу 19. и 20. септембра будзе и делеґация Националного совиту (НС) Руснацох – предсидатель Совиту Славко Рац и предсидателька Одбору за културу НС Ґабриєла Саянкович, котри з домашнїма буду бершедовац и о можлївосцох сотруднїцтва Руснацох у Сербиї и у тей часци Словацкей.
Тогорочни Фестивал пошвецени означованю 30-рочнїци снованя домашнього фолклорного ансамблу „Тепличан”, а през два днї тирваня наступя вецей фолклорни и музични ансамбли.
Предвидзена и богата провадзаца програма, як цо то промоция музичного компакт-диску з назву „На валалє Керестуре”, коштованє „керестурских єдлох”, предаванє ЦД, кнїжкох и друге.
Фолклорни шветочносци „У Керестуре на пажици граю” орґанизую и финансую Општина Земплински Теплици, Музей и Културни центер южного Земплину з Требишова и Управа за културу Кошицкого самоуправного краю.