ДЮРДЬОВ – Вчера вечар, на Други дзень Крачуна по юлиянским календаре, у просторийох КУД „Тарас Шевченко” у Дюрдьове отримани традицийни Крачунски концерт.
На Концерту коляди шпивали и винчовали дзеци з дюрдьовскей Предшколскей установи „Дюрдєвак”, дзеци з руского оддзелєня и вецей дзецинских шпивацких сецийох и солисти Дружтва, котрих провадзел Дзецински оркестер.
Концерт ше одвивал у импровизованим руским обисцу на Вилїю, а домашнї були Ана и Яким Чапково, котри за столом коло ядловца дочековали шпивачох и наградзовали их за колядованє и крачунски винчованки.
Крачунски концерт орґанизовал Управни одбор КУД „Тарас Шевченко”, а програму пририхтали уметнїцки руководителє Марина Сабадош, Блаженка Тимко Станкович, Мария Хромиш, Тамара Салаґ, Сенка Станкович, Яким Чапко, Михал Лїкар, Ана Радишич и младежска орґанизация. Пакецики обезпечели спонзоре и Дружтво.