РУСКИ КЕРЕСТУР – На Стретнуцу поетох и литературних творительох, хторе всоботу, 24. септембра орґанизовал Месни одбор Рускей матки (МО РМ) Руски Керестур, участвовали 12 особи рижних ґенерацийох зоз Шиду, Кули, Елемиру, а найвецей з Руского Керестура. Стретнуце отримане у сали керестурскей Месней заєднїци.
На Стретнуцу ше кратко представели и свойо литературни твори пречитали Саня Тиркайло зоз Шиду, Боро Латинович з Кули, Коцурец Томислав Скубан з Елемиру, та Керестурци Владимир Будински, Любка Варґа Кнежевич, Мелания Боянович, Славко Пап, Владимир Сеґеди, Михайло Катона, Юлиян Лазор, Жарко Остоїч и домашня стретнуца и предсидателька МО РМ Мария Дорошки. Поетох з музику провадзели млади музичаре – школяре керестурскей Ґимназиї Жарко Остоїч на тамбури и Павле Рац на тамбури бас прим.
Пред Стретнуцом Управни одбор РМ и Редакцийни одбор єй глашнїку „Руснак” отримали заєднїцку схадзку у просторийох Матки, хтору водзел предсидатель РМ Дюра Папуґа, а на нєй презентоване остатнє число глашнїку и порадзене о змисту идуцого.
Тиж бешедоване и о финалних орґанизацийних и технїчних пририхтованьох за перши Медзинародни русински филмски фестивал „Русин филм фест”, хтори будзе отримани 1. и 2. октобра у Шидзе.