КОЦУР – По одлуки Совиту Месней заєднїци Коцур, принєшеней на схадзки 19. септембра, тих дньох би мала почац вибудов дзецинского забавного парку, хтори будзе финансовани зоз средствох хтори МЗ заробела з предаваня местох за Кирбай.
На єдней з прешлих схадзкох члени Совиту ше зложели же тот пенєж будзе уложени до даякого проєкту на хасен валалу, а на прешлей схадзки одлучене же то будзе забавни парк. Потримовку тей идеї дала и Општина Вербас.
Плановане же дзецински парк з рижнима бависками будзе направени за мешац, а на Совиту одлучене же будзе на углє улїцкох Иси Секицкого и Дюру Бильнї, такой при стадионє ФК „Искра”, понеже у центре валалу уж єст забавни парк.